БИШКЕК, 7-июл. — Sputnik. Кыргызстандагы 20 шаарды өнүктүрүү программасын иштеп чыгуу жана ишке ашыруу — өлкөнүн экономикалык багытындагы реформалардын башаты. Бул тууралуу премьер-министр Мухаммедкалый Абылгазиев Ысык-Көл облусуна болгон иш сапарында айтты.
Өкмөт башчы белгилегендей, аймактарды өнүктүрүү жакынкы бир нече жылдарга карата мамлекеттик саясаттын артыкчылыктуу багыты болуп саналат.
"Башкы максат — географиялык жайгашуусуна жана климаттык шарттарына карабастан, мамлекеттик кызматтарды көрсөтүү бардык аймактарга жеткиликтүү болушу керек. Өнүгүү түйүндөрү болуп эсептелген 20 шаарды өнүктүрүү учурдагы негизги пландардын бири", — деди премьер-министр.
"Жаратылыш шарттары боюнча Ысык-Көл облусунун таянычы туризм болуп саналат. Каракол шаары үчүн — туризм тармагындагы долбоорлорду ишке ашыруу артыкчылыктуу багыт. Буга байланыштуу туристтик кызматтарды көрсөтүү деңгээлин, инфраструктураларды жакшыртып жана коммуникациялык байланыштын сапатын жогорулатуу зарыл", — деди Абылгазиев.
Ошондой эле бул багытта алдыда бир нече көчмө жыйын өткөрүлөрү кошумчаланды.
