БИШКЕК, 29-июн. — Sputnik. Мамлекеттик каттоо кызматынын (МКК) бардык каттоо-экзамен бөлүмдөрү 3-июлга чейин дем алышсыз иштейт. Бул тууралуу МККнын маалымат кызматы билдирди.
2-июлда транспортту кайра каттоо боюнча улуттук кампания аяктайт.
Мамлекеттик каттоо кызматынан билдиришкендей, автотранспорт ээлери көп болуп жаткандыктан 29-30-июнда жана 1-2-июлда аталган бөлүмдөр 8:30дан 21:00гө чейин иштейт.
Маалымат боюнча 2-апрелден 28-июнга чейин 113 миң 193 киши машинасын кайта каттаткан.
Белгилей кетсек, 3-июлдан тарта өкмөттүн 26-июнда кабыл алган токтому күчүнө кирет. Ага ылайык, автотранспортту кайра каттатуу анын базар баасындагы наркынан 1 пайыздан 0,3 пайызга чейин жетет. Андыктан Мамлекеттик каттоо кызматы автоунааны ишеним кат менен айдап жүргөндөрдү жыл аягына чейин машинаны кайра каттатууга чакырат.
