БИШКЕК, 25-июн. — Sputnik. Жамиля Насирова аттуу жаран Октябрь райондук ИИБдин начальнигинин орун басары тарабынан кордолгонун Facebook баракчасына жазып чыкты.
Анын айтымына караганда, окуя 23-июнь күнү чак түштө болгон.
"40 жаштар чамасындагы бейтааныш адам автоунаасынан чыгып, бизди көздөй "өлтүрөм, соём" деп эле чуркап жөнөдү. Жолдошум милиция чакырыш үчүн үйгө кирип кетти. Мен болсо аны менен сүйлөшүүгө аракет жасадым. Бирок ал подъезддин эшигин тарткылап, коркуткан сөздөрүн айта берди. Кой, ачууга алдырба десем мени асфальтка улактай көтөрүп чапты. Тизем, оң ийиним сыйрылып, кан акты", — деди Насирова.
Жабырлануучу ага эч себеби жок кол салган А.Н. аттуу адам Октябрь райондук ИИБдин начальнигинин орун басары экенин айтып, ага карата чара көрүү сунушу менен президентке, ИИМ жетекчисине жана Октябрь РИИБге кайрылуу жасады.
Ал эми Бишкектин ички иштер башкы башкармалыгы аталган факты Октябрь РИИБинде каттоого алынганын Sputnik Кыргызстан агенттигине маалымдады.
"Эки тарап тең арыз жазды. А.Н. окуяга чейин бир нече саат мурда үйүнө кирип кеткен киши анын апасын сугат суу үчүн сөгүп салганын билдирди. Ошол учурда анын үйүндө апасынан башка эч ким болгон эмес экен", — деп милициядан айтышты.
Милиция ошондой эле А.Н. Октябрь райондук ИИБде үч жылдан бери иштебей турганын, ал учурда ИИМдин академиясында мугалим экендигин белгиледи.
Аталган факты боюнча кызматтык иликтөө башталды, эми анын жыйынтыгы менен окуяга юридикалык баа берилет.
