БИШКЕК, 17-июн. — Sputnik. Ысык-Көлгө эс алганы келген үч чет элдик жаран жол кырсыгына кабылып, жеңил жаракат алды. Бул тууралуу облустук ишки иштер башкармалыгынан билдиришти.
Маалыматка ылайык, окуя 16-июнь күнү 11.00дөр чамасында Ак-Суу районунун Алтын-Арашан капчыгайында болгон. Анда эки голландиялык жана бир кытайлык турист унаа жалдап алып тоого чыккан.
"Алар капчыгайда эс алып жүргөндө аба ырайы кескин өзгөрүп, нөшөрлөгөн жаан жолдун абалын начарлаткан. УАЗ менен кайра айылга келе жатканда унааны бир дөңгөлөгү аңга кирип кетип, туристтер жабыркаган",— деп кабарлашты ОИИБден.
Окуя болгон соң жабырлануучулар жакынкы ооруканага кайрылып, аларга медициналык жардам көрсөтүлгөн. Учурда алар эс алуусун улантууда.
