Биз кыргыз армиясын нөлдөн баштап түптөп келе жатабыз. Албетте, кемчиликтер бар, бирок жетишкендиктер да жок эмес. Мындай пикирин Асанбек Алымкожоев Sputnik Кыргызстан радиосунун таңкы эфиринде КР Куралдуу Күчтөрүнүн күнүнө карата маек куруп жатып билдирди.
Анын айтымында, армия — өлкөнүн жүзү, бирок анын абалы экономикага көз каранды.
"Биз эгемендүүлүк алган кезде армиябыз жок болуп кетүү коркунучунда эле. Бир бөлүмдөн 200-300 жоокер эмес, офицерлер кетип калган учурлар болгон. Ал эми азыр аскер кызматын өтөп жаткан жоокерлердин 30 пайызын ЖОЖду бүткөндөр түзөт. Советтер Союзунан калган эски техникалар пайдаланылат. Бул жаатта мактана албайбыз, бирок аскердик даярдыгыбыз менен эч кимден кем калышпайбыз десек болот. Кайсы өлкөнүн экономикасы күчтүү болсо, анын аскери да күчтүү болот, ошого карабай биздин армияда жылыштар бар", — деди Алымкожоев.
Ал Кыргызстан бул жаатта ЖККУ, ШКУ сыяктуу чоң-чоң уюмдар менен тыгыз иштешүүсү керектигин кошумчалады.
