Бир мектепте тогуз кыргыз тилчи мугалим бар экен. Жумасына 54 сааттык сабак болсо, болгону үч мугалим жетиштүү болмок. Мындай пикирин Салмоорбек Асанов Sputnik Кыргызстан радиосуна министрдин мугалимдерге саат бөлүштүрүүдөгү босого жүктөмү боюнча буйругун талкуулап жатып билдирди.
Анын айтымында, министрдин бул буйругу чыныгы кесипкөйлөрдү тандоого багытталган.
"2015-жылы өлкө аймагында 72000 мугалим иштечү, 2017-жылы бул сан 79000ге жетти. Эки жыл ичинде жети миңге көбөйүп жатат. Ооба, бул аралыкта балдардын саны да өстү, бирок башкы себеби аз саат менен иштөө мүмкүнчүлүгү пайда болгонунда. 4-5 саат менен иштеп 2000ге жетпеген айлык алган мугалимдер бар. Ал эмне деген мугалим? Күнүнө бир жолу, бир саатка мектепке келип коет. Андан кандай билим деңгээлди күтүш керек? Мына ушундай мугалимдер "биз ишсиз калабыз" деп нааразычылык билдирип чыгышууда. Балдарды билимдүү, тажрыйбалуу мугалимдер окутушу керек", — деди Асанов.
Ал мындай көйгөйлөр көбүнчө кыргыз, өзбек тилдүү мектептерден чыгып жатканын кошумчалады.
Эскерте кетчү жагдай, респонденттин пикири редакциянын көз карашына дал келбей калышы мүмкүн.
