БИШКЕК, 21-май — Sputnik. Балыкчы шаарында төрөттөн 33 жаштагы келин каза болду. Бул тууралуу Sputnik Кыргызстан агенттигине өлкөнүн башкы гинекологу Раиса Асылбашева маалымдады.
Анын айтымында, окуя 17-май күнү катталган.
"Кош бойлуу келин Балыкчы аймактык ооруканасына кан басымы көтөрүлүп, өтө оор абалда келип түшкөн. Дарыгерлер аны операция жолу менен төрөтүп, эгиз балдарды жарык дүйнөгө алып келери менен аялдын жүрөгү токтоп көз жумган. Маалым болгондой, эгиздердин апасы буга чейин бир да медициналык жайга каттоого турган эмес. Өзүнүн жашаган жери Нарын облусунун Жумгал районундагы Чаек айылы экендиги такталды. Балыкчы шаарында ал убактылуу жашап жатканы же конок болуп келгени учурда такталууда. Абалы оор болуп түшкөндүктөн Бишкек, Каракол шаарларынан санавиация жөнөткөнбүз, бирок ага жетпей үзүлүптүр", — деди Асылбашева.
"Келиндин эмнеден улам көз жумганынан аныктоо кыйын болуп жатат. Жок дегенде дарыгерлерге 1-2 күн эрте кайрылганда аман калмак беле. Учурда соттук медициналык-экспертиза дайындалды. Анын жыйынтыгы чыкканча келиндин өлүмүнө эмне себеп болгонун айтуу кыйын", — деди Асылбашева.
Маалым болгондой каза болгон келиндин эгиздерге чейин бир баласы бар болчу. Асылбашева жолдошунун бар-жогу такталып жатканын кошумчалады.
