БИШКЕК, 10-май — Sputnik. Кыргызстандын футбол федерациясы "Азия чемпионаты — 2019" оюндарынын тайпалык этабынын расписаниесин жарыялады. Анда ата мекендик команда кайсы күндөрү ойной турганы жазылган.
Азия чемпионаты 2019-жылы Бириккен Араб Эмиратында өтөт. Ага биринчи жолу катышып жаткан Кыргызстандын курама командасы Кытай, Филиппин жана Түштүк Корея өлкөлөрүнүн футболчулары менен ат салышмакчы.
Тайпалык этаптын оюндары январь айында өтөт.
Бишкек убактысы боюнча расписание:
Кытай — Кыргызстан (7-январь, 18:00), Аль-Айн шаары, Hazza bin Zayed Stadium стадиону;
Кыргызстан — Түштүк Корея (11-январь, 23:00), Аль-Айн шаары Khalifa bin Zayed Stadium стадиону;
Кыргызстан — Филиппин (16-январь, 20:30), Дубай шаары Rashid Stadium стадиону.
Футбол боюнча Кыргызстандын курама командасы март айында Мьянма менен Индияны утуп, биринчи жолу Азия чемпионатынын финалына чыккан. Анда кыргызстандыктарды ФИФАнын башкы катчысы Фатма Самура, 1998-жылкы футбол боюнча дүйнө чемпиону, "Реал Мадриддин" мурдагы оюнчусу Кристиан Карамбе куттуктаган.
