БИШКЕК, 7-май — Sputnik. Кыргызстандын дзюдо боюнча кыз-келиндердин курама командасы Европа кубогуна катыша тургандыгын Жаштар иши, дене тарбия жана спорт боюнча мамлекеттик агенттиктен кабарлашты.
Мелдеш 11-13 май күндөрү Россиянын Оренбург шаарында өтөт. Анда өлкө намысын Назима Амантурова (52 кг), Ксения Бельдигина (57 кг), Зирегүл Кадырова (63 кг) жана Айжан Кадырбекова (70 кг) коргойт. Спортчуларды башкы машыктыруучу Талантбек Дүйшөнбеков коштоп барат.
Мелдештен кийин спортчулар үч күн атайын машыгуу өткөрөт.
Дзюдо боюнча курама командага спорттун олимпиадалык түрү боюнча дирекция тарабынан 108 миң сом каралган.
