БИШКЕК, 4-май — Sputnik. Жогорку Кеңештин депутаты, мурдагы энергетика министри Осмонбек Артыкбаев Бишкек ТЭЦтин модернизациялоо боюнча "министр катары өзүм кол койгон документтердин деңгээлинде жооп бергенге даярмын" деп Sputnik Кыргызстан агенттигине билдирди.
Белгилей кетсек, январь айынын аягында Бишкек ТЭЦтинде болгон аварияны жана аны модернизациялоого кеткен акчанын коротулушун иликтеген депутаттык комиссия экс-премьер-министр Жантөрө Сатыбалдиев менен мурдагы энергетика министри Осмонбек Артыкбаевдин жоопкерчилиги каралышы керек деген корутунду чыгарган.
Ал ошондой эле Бишкек ТЭЦтин модернизациялоо боюнча сүйлөшүүлөр 2012-жылы эле башталганын, 2013-жылы Кытайдын ТВЕА компаниясы менен Кыргызстандын "Электр станциялары" ААКы макулдашууга жетишкенин билдирди.
Андан сырткары ал башкарып турган министрликтин жетекчилиги тагдыр чечүүчү бир да келишимге кол койбогонун айтты.
"Бишкек ТЭЦтин модернизациялоо боюнча конрактык келишимге "Электр станциялары" ААКтын жетекчиси, ал эми Кытайдын "Эксимбанкы" менен насыялык келишимге финансы министри кол койгон. Насыялык келишим бардык министрликтер жана ведомстволор менен макулдашылган соң, токтом кабыл алынган. Аны Жогорку Кеңештин комитеттери карап, кийин парламент мыйзам менен келишимди жактырып, депутаттар колдоп берген. Андан кийинки иштин бардыгын "Электр станциялары" ААКы жүргүзгөн", — деди ал.
Депутат ошондой эле документтердин бардыгына Артыкбаев кол койду деген маалыматтар чындыкка туура келбей турганын белгиледи.
"Модернизациялоо иштериндеги документтердин бардыгына Артыкбаев кол койду деген туура эмес. Министрлик ошол иштерди координациялап, багыттаган, — деди ал.
Эске салсак, быйыл 26-январда Бишкек ТЭЦтинде авария болуп, шаардыктар бир жума жылуулуксуз калган. Алгач авариянын себептерин аныктоо маселеси көтөрүлүп, кийин ТЭЦти модернизациялоого кеткен Кытайдын 386 миллион доллар насыясынын сарпталышын да иликтөө маселеси көтөрүлгөн.
