Ош шаарындагы Черемушки кичирайонунун Абдыкадыров көчөсүндө жолдон өтүп бараткан 6 жаштагы кызды Mersedes үлгүсүндөгү унаасын айдап бараткан айдоочу кыз койдуруп кетти. Окуянын видеосун күбөлөр Sputnik Кыргызстан агенттигине жиберишкен.
Күбөнүн айтымында, окуя 28-апрель күнү саат 10:22лер чамасында катталган.
"Абдыкадыров көчөсү менен бараткан Mersedes үлгүсүндөгү унааны башкарган айдоочу кыз жөө кишилер өтчү белгиден чуркап өтүп бараткан 6 жаштагы кызды койдуруп кетти. Айдоочу бөбөктү койдуруп албаш үчүн унааны оң тарапка бурууга аракет кылды. Бирок кыз унаанын буферине урунуп, эсин жоготуп жатып калды. Айдоочу окуя болгон жерден качып кетпестен жабырлануучуну ооруканага алып жөнөгөн. Бирок жабырлануучунун ата-энеси ошол жерге жакын жашагандыктан дароо келишти. Кыз өтө катуу жаракат алган эмес. Эсине келген соң кызды ооруканага алып барышкан жок", — деди күбө.
Кыздын жакындары ооруканага кайрылбагандыктан, бул факты шаардык оорукананын травматология бөлүмүнө катталбагандыгы белгилүү болду.
Ал эми шаардык милиция бул тууралуу билдирүү тарата элек. Жол кыймылы коопсуздугун камсыздоо бөлүмүнүн маалымат кызматы окуя тууралуу маалымат берүүдөн баш тартты.
