БИШКЕК, 30-апр. — Sputnik. Кыргызстанда эртең биринчи ирет жаңы стилде, атактуу англиялык драматург Уильям Шекспирдин "Макбет" трагедиясы Токтоболот Абдумомунов атындагы Кыргыз улуттук академиялык драма театрында коюлмакчы. Бул туурасында аталган театрдан кабарлашты.
Аны Лондондогу "Глобус" театрынын режиссеру жана актрисасы Сара Жейн Бергер коет.
"Спектакль кыргыз-англис тилинде жүрөт. Башкы ролдо Стив Хейз, Клейр Картврайт (Лондон), Альбина Имашева, Атай Өмүрбеков. Продюсери — Юлдош Журобаев", — деп билдиришти аталган театрдан.
Бул долбоор драматург, жазуучу Султан Раевдин демилгеси менен башталган.
Театр сүйүүчүлөргө спектаклдин премьерасы 1-2-3-4-майда тартууланат.
Сара Бергер — Улуу Британиянын Королдук театрында Шекспирдин чыгармаларынын негизинде бир топ спектаклдерди койгон белгилүү режиссер.
"Макбет" — Уильям Шекспирдин белгилүү трагедияларынын бири. Чыгарма Шотландия падышасы Макбеттин жашоосунан алып жазылган. Анда Шекспир бийликке жетүү үчүн адамдардын жан талашуусу, достордун сатып кетүүсү, адамзаттын утурумдук кызыкчылык үчүн пендечилиги чагылдырылган.
