Күбө Бишкекте 26-апрелде саат 3.40тар чамасында болгон жол кырсыгынын видеосун Sputnik Кыргызстан агенттигинин WhatsApp номерине жөнөттү.
Анда Муромск жана Чортеков көчөлөрүнүн кесилишиндеги тосмо менен бордюр катуу кыйшайып калганын көрүүгө болот.
Жол кыймылы коопсуздугун камсыздоо башкы башкармалыгынын Бишкек шаары боюнча ички иштер башкы башкармалыгынын маалымат катчысы Азамат Маратовдун айтымында, Toyota Vitz автоунаасынын айдоочусу Чортеков менен түндүктү карай баратып, рулду башкара албай, тосмону барып сүзгөн.
"Жол кырсыктан 25 жаштагы жүргүнчү бала менен кыз жабыркаган. Айдоочу окуя болгон жерден качып кеткен", — деди Маратов.
Жаракат алгандар Бишкек шаардык илим изилдөө травматология жана ортопедия борборунун травматология бөлүмүнө жеткирилген.
Учурда окуянын чоо-жайы такталып, айдоочуну табуу аракеттери көрүлүүдө.
Эгер кандайдыр бир кызыктуу окуяларга туш болуп калсаңыз тарткан сүрөт, видеолорду биздин +996 706 566 544 WhatsApp же Telegram номери аркылуу билдирсеңиз болот.
