БИШКЕК, 24-апр. — Sputnik. Талас облусунда дагы кечинде саат 18:00дөн 20:00гө чейин ылдамдыгы секундасына 14-20 метрге жеткен шамал катталганын ӨКМдин маалымат кызматы билдирди.
Ага ылайык, катуу шамал Талас районунун Кум-Арык айылында бир турак үйдүн чатырын учуруп кеткен.
Мындан сырткары Бишкек шаарында жана Чүй облусунун аймагында секундасына 20 метрге чейин жеткен катуу шамал болууда.
Белгилей кетсек, кечинде Бишкек шаарында болгон шамал борбордук "Ала-Тоо" аянтындагы желекти жулуп кеткен. Ошондой эле калаанын айрым жерлеринде дарактар менен зымкарагайлар кулаганын социалдык тармактын колдонуучулары жазышууда.
Бүгүн кечке маал ӨКМ Бишкек шаары менен Чүй облусунун аймагында катуу шамал болорун эскерткен болчу.
Шамалдын ылдамдыгы секундасына 24 метр жана андан жогору, ал эми тоолу райондордо 35 метр жана андан жогору болгондо, өзгөчө кырдаал деп аныкталат.
