Бейитти тебелеп-тепсеп, кор кылбаш үчүн кыргыз элинде байыртан эле ага карата бир катар тыюулар орун алган. Бул жолу биз этнопедагог Абдыкерим Муратовдун көмөгү менен мүрзөгө тиешелүү болбой турган учурларды карап чыктык.
Мүрзөнүн жанынан каткырып-күлүп өтпөйт. Бейиттин жанынан өтүп баратканда келме келтирип, колдон келсе жалпы арбактарга арнап куран окуп коюш керек.
Мүрзөдө уктабайт. Көрүстөндө тамак ичип, оюн-күлкүнүн жаңырышы да туура эмес. Бул арбактарды сыйлабагандык болуп эсептелет.
Мүрзөнү карап даарат ушатпайт. Жакындарыңан ажырап каласың деген ишеним жашаган.
Мүрзөдө отуруп ичимдик ичпейт, урушпайт. Бейитте арак ичип, жаңжалдашкан кишилер жашоосунда жамандыкка кабылат деп айтылып жүрөт.
Көрүстөн тарапты сөөмөй менен көрсөтпөйт. Кокус көрсөтүп алса, анда сөөмөйүн буту менен тебелеп же тиштеп койгон ырым эл арасында колдонулуп келет.
