Эки күн мурда интернет тармагына бокс боюнча мелдештин видеосу жарыяланган. Анда балдар жылаңач полдо орнотулуп, эки чети дубал болгон рингде боксташып жатканын көрүүгө болот. Социалдык тармактын колдонуучуларынын бири мушкерлердин ден соолугуна кабатыр болсо, экинчиси "бокс учурда кейиштүү абалга келдиби" деп суроо салган.
Көп өтпөй видео 6-8 апрель күндөрү Кочкор-Ата шаарында өткөн өспүрүмдөр арасындагы Ноокен районунун биринчилигинде тартылганы белгилүү болду. Бул тууралуу Мамагенттиктин маалымат кызматынын жетекчиси Нурдин Султамбаев билдирди.
"Кочкор-Атада мелдеш өткөрүүгө рингдер жетишсиз экендиги чындык. Бирок уюштуруучулар Жалал-Абад облусундагы шарты бар жерде турнир өткөрүүгө милдеттүү болчу. Алар эрежени бузуп спорт мектептин жөнөкөй залында өткөрүшкөн", — деди Султамбаев.
Ошондой эле Султамбаев мелдеш учурунда жаракат алгандар болбогонун кошумчалады.
Буга чейин Sputnik Кыргызстан маалымат агенттиги өлкөнүн эң мыкты жаш боксчуларын тизмектеген.
