БИШКЕК, 11-апр. — Sputnik. Sputnik Кыргызстан маалымат агенттиги жана радиосу жазуучу Төлөгөн Касымбековдун "Сынган кылыч" тарыхый романы боюнча инновациялык долбоорун Чүй облусуна караштуу Сокулук районундагы мектеп жана гимназиялардын кыргыз тили жана адабияты боюнча мугалимдерине презентациялады.
Иш-чарага райондогу 40 билим берүү мекемелеринин өкүлдөрү катышты. Аларга онлайн-режим аркылуу www.sputnik.kg сайтынан аудио китепти кантип туура колдонуу боюнча маалымат берилди.
Долбоордо романдын 27 сааттык аудио китеби, чыгарманын толук жана кыскартылган тексти, ошол доордогу маанилүү делген окуялардын интерактивдүү картасы, 180ге жакын каармандын таржымалы жана илимий макалалар камтылган.
Чыгарманы үн менен коштоого, тагыраагы, аудио китепти өлкөдөгү кино жана театр жаатындагы белгилүү актерлор окуган.
Sputnik Кыргызстан маалымат агенттиги жана радиосу 2014-жылдын декабрынан тарта ишин баштаган. Өз окурмандары, угармандары жана көрөрмандарына 24 саат бою кыргыз, орус тилдеринде маалыматтарды жеткирип турат.
Sputnik Кыргызстан ондогон мамлекетте мультимедиалык маалымат хабына ээ эл аралык маалымат агенттиги жана радиосунун бир бөлүмү болуп саналат.
Sputnik 30дан ашык тилде маалымат таратат.
