БИШКЕК, 6-апр. — Sputnik. Экс-депутат Мээрбек Мискенбаевдин күнөөсү аныкталса, жоопкерчиликке тартылат. Бул тууралуу Жогорку Кеңештеги "Ата Мекен" фракциясынын Башкы прокуратуранын жасаган иштери боюнча отчетун угуу маалында башкы прокурордун биринчи орун басары Бөкөнбай Казаков айтты.
Эл өкүлдөрү талкуу учурунда КСДП партиясы Кытайдан келген 1 миллион доллар жана Liglass компаниясы боюнча кылмыш иши козголгон-козголбогонуна кызыкты.
Казаков 1 миллион боюнча маалыматы жоктугун, Liglass компаниясы менен болгон келишим бир тараптуу бузулгандыктан кылмыш иши козголбогонун жана компаниянын баштапкы салымы мамлекетте калганын айтты.
Ошондой эле былтыр прокурарада иштеген канча кызматкерге кылмыш иши козголгону боюнча узатылган суроого "бир да кызматкерге кылмыш иши козголгон эмес" деген жооп болду.
