БИШКЕК, 5-апр. — Sputnik. Болливуд жылдызы Салман Хан мындан 20 жыл мурда сейрек кездешүүчү жаныбарды өлтүргөнү үчүн беш жылга эркинен ажыратылганын The Daily Mail басылмасы жазды.
Ага ылайык, актер 1999-жылы экранга чыккан "Бизди эч ким ажырата албайт" ("Нас не разлучить") тасмасын тартуу учурунда коруктагы сейрек кездешкен антилопаны өлтүргөнү үчүн күнөөлүү деп табылды.
Браконьерчилик боюнча айыптоо корутундусун Жодхпур шаарынын соту бейшемби күнү чыгарды. Сотто актерден тышкары тартуу тобунун мүчөлөрү Саиф Али Хан, Табу, Сонали Бендре жана Нилам болгон. Бирок алар далилдин жоктугунан улам жоопкерчиликке тартылган эмес.
52 жаштагы Салман Хан Болливуддагы эң атактуу жана бай актерлордун катарын толуктайт. 2017-жылы Forbes журналы аны эң көп акча тапкан өнөрпоз атап, 9-орунда экенин белгилеген. Ал былтыр 37 миллион доллар иштеп тапкан.
