БИШКЕК, 2-апр. — Sputnik. Өзбекстандын президенти Шавкат Мирзиёев кичи мекени Жиззах облусундагы Манас айылына келгенин Sputnik Өзбекстан маалымат агенттиги жазды.
Манас айылы 1960-жылдары негизделип, учурда 6,5 миңден ашык киши жашайт. Кыска убакыттын ичинде бул айыл "өлкөдөгү эң мыкты" айылдардын катарын толуктаганы айтылат.
"Манас айылы президенттин "Жайлуу айыл" ири программасынын баштапкыларынын бири болуп калды. Бул программа өлкөнүн алыскы аймактарындагы жашоону жакшыртууга багытталган", — деп белгиледи агенттик.
Эки күндүк сапарда Мирзиёевге Жиззах облусуна курулуп жаткан жаңы конуштардагы жети кабаттуу он үй, Үчтепе, Токчилик айылдарында курулуп жаткан көп кабаттуу үйлөр боюнча маалымат берилген.
Былтыр облустагы 345 үй кайтадан оңдолгону айтылса, быйыл 409 үйдү реконструкциялоо пландалууда.
