Бишкекте коомдук тамактануучу жайлардын абалы канааттандырарлык. Бул тууралуу Майрам Иманкулова Sputnik Кыргызстан радиосуна маек куруп жатып билдирди.
Анын айтымында, тамактануучу жайларда атаандаштык күч болгондуктан, тамак-аштын сапатын жакшыртууга ар бир ишкер кызыкдар.
"Биз пландык негизде гана кафе, ресторандардын тамак-аш боюнча тазалыгын текшеребиз. Каалаган учурда эле барып текшерүүгө ала албайбыз. Бирок барганда алгач эле тамак-аш кардарлардын ден соолугуна зыян келтирбейби, тиешелүү документтери барбы, аба түтүкчөлөрү жасалганбы, тамак-аштын сапаты кандай деген суроолорго жооп издейбиз", — деди дарыгер.
Ал ошондой эле санитардык-эпидемиологиялык көзөмөлдөө башкармалыгынын адистери кафе, ресторандардын ээлери менен тыгыз байланышта болуп, кызыктырган суроолоруна дайыма жооп берип турушарын кошумчалады.
