БИШКЕК, 26-мар. — Sputnik. Чүй облусунун Жайыл, Аламүдүн РИИБдеринин жана Ош шаардык ички иштер башкармалыгынын кызматкерлерине карата Башкы прокуратура кылмыш ишин козгоду.
Маалыматка ылайык, криминалдык милиция кызматынын өкүлдөрү ыкчам-иликтөө иш-чарасы учурунда ири суммадагы акча уурдашкан. 2018-жылы 18-февралда Аламүдүн менен Жайыл РИИБдин криминалдык милиция кызматы көп суммадагы каражат уурдады деген шек менен А.Н. аттуу жаранды кармаган. Аны жана жакындарын өлтүрөбүз деп коркутуп, акча катылган жерди көрсөтүүнү талап кылышкан.
Башкы прокуратура милиция жарандардын укугун коргогондун ордуна аларды басмырлап, опузалап, кызмат абалынан кыянаттык менен пайдаланган учурлар биринчи жолу катталып жатпаганын белгилеген.
Ушундай эле кылмыш иши Ош ШИИБдин кызматкерлерине карата козголгон. 2018-жылы 16-январда милиция Кара-Кулжа районундагы карактоо фактысы боюнча тинтүү жүргүзүлгөн.
"Шектүүлөр уурдалган акчаларды бир нече жерге каткан. Бирок тергөө учурунда түзүлгөн протоколго 1 миллион 740 миң сом жазылбай калган. Андан сырткары, милиция шектүүлөрдүн биринин тааныш кызын Ош шаардык ИИБде кармап, шектүүнүн алардын пайдасы үчүн көрсөтмө беришин талап кылган. Шектүү киши макул болгондо гана кызды коё беришкен", — деп айтылат маалыматта.
Учурда аталган кылмыш иштери тергөө үчүн Улуттук коопсуздук мамлекеттик комитетине берилди.
