БИШКЕК, 25-мар. — Sputnik. Өзбекстандын Фергана шаарында эшек союп, этин лагман жана самса саткан жайларга өткөргөндөр кармалды. Бул тууралуу Sputnik Өзбекстан агенттиги жазды.
"Өзбекстан 24" телеканалы көрсөткөн сюжетте айтылгандай, эшек этин алган кафелер тамактарын уй же кой этинен жасалган деп сатып жүрүшкөн.
Маалыматка караганда үч жаран жергиликтүү тургундардан эшектерди 250-300 миң сумдан (30-37 доллар) сатып алып, этинин ар бир килограммын кафелерге 25-30 миң сумдан (3-4 доллар) өткөрүп жүрүшкөн.
Эске салсак, мындай окуя Кыргызстанда дагы болгон. 2015-жылдын башында жергиликтүү жалпыга маалымдоо каражаттары Сокулук районундагы Ак-Жол айылында эшек союлуп, эти сатылып жатканы боюнча маалымат таратып, ал коомчулукта чоң талкуу жараткан. Эшекти союу менен алектенген "Кайтал" акционердик коомунун өкүлдөрү алардын ишмердиги мыйзамдуу экенин айтып, эшектин эти Кытайдагы зоопарктарга өткөрүлүп келгенин билдиришкен.
