Бир ай мурда Жеңишбектин саламаттыгы начарлап кеткен. Дарыгерлер паразиттер көбөйүп, дарыга дагы туруштук берип калганын айтышууда. Алты айдын ичинде ага операция жасалышы керек. Боорду алмаштыруу 45 миң долларды чапчыйт. Жеңишбек Касымов алты жылдан бери таштанды чыгаруучу болуп иштейт. Айлыгы 25 миң сомдон ашпагандыктан, кымбат операция жасатууга чачма-чаркы чак.
"Бул үй-бүлөм үчүн көп каражат. Айлыгым 20-25 миң сом, ипотекам да бар, үч баланы да багыш керек. Насыя алганыма бир жыл эле болгондуктан үйүмдү да сата албайм. Аялым балдар менен үйдө, иштебейт. Акчаны таппай калам деп ойлогондо жүрөгүм түшөт", — деди ал.
Касымовдун үч баласы бар. Улуу баласы 4-классты аяктайт, кызы үч жашта, кичүү уулу алты айлык. Үй-бүлөсүн Жеңишбек гана багат, учурда ден соолугунан улам ооруканада. Муниципалдык ишкананын кызматкерлери маянасынан Жеңишбекке жардам катары 6 миң доллар чогултуп беришкен. Дагы төрт миң доллар кайдыгер эмес жарандардан келген.
Жеңишбекке эки бир тууганы донор болууга даяр.
Дарыгерлердин айтымында, Жеңишбек алты айга чейин, башкача айтканда, 2018-жылдын августуна чейин операция жасатууга үлгүрүп калышы кажет.
