БИШКЕК, 16-мар. — Sputnik. Непалдан келген инвестор Бинод Суадхари КР премьер-министри Сапар Исаковдун күйөрманы экенин Sputnik Кыргызстан агенттигинин мультимедиалык маалымат борборундагы жыйында билдирди.
Ал кайсы тармакта бизнести өнүктүрүү керектигин өкмөт башчы менен биргеликте аныктай турганын айтты. Инвестор Кыргызстанда ишкерликти өнүктүрүү боюнча кандай инструменттерди колдонуу керектигин билерин кошумчалады. Миллиардер дал ошол тармакка инвестиция салмакчы.
"Силердин премьер-министрди көргөндө эле анын күйөрманы болуп калдым деп айтсам болот.Суктанам, энергиясы ашып-ташып турат экен. Демилгелүү, аракетчил. Бул лидер үчүн эң маанилүү сапаттар", — деди ал.
Ишкер Кыргызстан бир гана сапаттуу кийим өндүрүүнүн борбору эмес, түрдүү шаймандарды чыгаруу (мисалы тоо экспедициясы үчүн) боюнча дагы алдыга чыга аларын белгиледи.
