БИШКЕК, 11-мар. — Sputnik. Үстүбүздөгү жылда Бишкек шаарын майрамдарга карата кооздоого 8 миллион 320 миң сом сарпталат. Бул тендерди мэриянын алдындагы Капиталдык курулуш башкармалыгы жарыялап, маалымат КРдин мамлекеттик сатып алуулар сайтына жарыяланды.
Тендер көрнөк-жарнактар үчүн панно даярдоого жарыяланды. Анын ичине баннерлерди орнотуу жана дизайнерлик кызматтардын акысы дагы кирет.
Мэрия быйыл заказ кылчу көрнөк-жарнактардын тизмеси төмөнкүдөй:
— Бишкек шаарынын 140 жылдыгына — 5 миң баннер;
— Жеңиш күнүнө — 5 миң баннер;
— Энелер күнүнө жана Балдарды коргоо күнүнө — 1 миң баннер;
— Эгемендүүлүк күнүнө — 10 миң баннер;
— Дүйнөлүк көчмөндөр оюнуна — 10 миң баннер;
— Жаңы жылга — 10,5 миң баннер.
Ошондой эле мэрия капысынан чыгып калган иш-чаралар үчүн деп 8 миң баннер даярдоону пландап жатканы айтылды. Тендер шаардык бюджеттен каржыланат.
Баса, быйыл кыргызстандыктар үчүн майрам күндөр көп. Кайсы айдын кайсы күнүндө эс алабыз деген суроо пайда болсо, Sputnik Кыргызстан агенттигинин календарынан көрүңүз.
