Диктор эфир алдында күлкүлүү окуяларды укпоого жана көйгөйлүү нерселерди ойлобогонго аракет кылышы керек. Бул тууралуу Кабатай кызы Sputnik Кыргызстан радиосуна маек куруп жатып билдирди.
Анын айтымында, диктор эфирге чыгаардан мурда текст менен сөзсүз таанышышы керек.
"2005-жылы революциядан кийин улам-улам митингдер болуп турган. Ошол кезде эфир алдынан редактор чуркап келди да 16-колонияда көтөрүлүш чыкканын айтып, жаңылыктарды ушул маалымат менен баштоо керектигин билдирди. Менин го үстүртөн ал жаңылык тууралуу маалыматым болду. Анан шапка кетти, музыка кетти, ошентип эфир башталды. Суфлёрду карасам эле "Бүгүн 16-колонияда бут чыкты" деп жазылып турат. "Бунт" деген сөздү жазабыз деп, шашып "н" тамгасы түшүп калган экен. Эфир учурунда баарына даяр болуп, ушундай кырдаалдардан чыгып кетүү керек. Анан диктор эфир алдынан күлкүлүү окуяларды укпоого аракет кылуусу зарыл", — деди Кабатай кызы.
Диктор алып баруучунун дүйнө таанышы кенен болушу керектигин кошумчалады.
