"Ак аюну" жеңген Проценко: Тилек Жээнбековго дагы өз ыкмамды колдоном

Көп өтпөй дагы бир кыргызстандык мушкер Тилек Жээнбеков украиналык Проценкону беттешке чакырган. Эми мушкерлер 6-мартта WEF Global 11 турниринин алкагында жолугат.

21 жаштагы Проценко маанилүү таймашка кызуу даярданып жаткандыгына карабай интернет аркылуу Sputnik Кыргызстан маалымат агенттигине маек берип, спорттогу жолу, бала чагы, Жээнбеков менен боло турчу беттеши тууралуу оюн айтып берди. 

Спортко болгон кызыгуу

Юрий бала чагынан эле турмуштун оош-кыйышын көргөн. 8 жашынан тарта базарда жүк түшүрүп иштеп, мектептеги окуусун калтырып койгон учуру көп болгон. Ошол кезде эркин күрөш менен машыккан эжеси инисин да кошо спортко алып келет. Юрий башында эркин күрөш менен алектенип жүрүп, кийин Украинада популярдуу спорттун түрүнө айланган панкратионго өтүп, эрежесиз уруш мушкери катары калыптанган.

Кан менен зулумдукту жактырат

Эрежесиз урушту тандап алгандыгынын себеби бул спорттун түрү кан жыттанып, зулумдук үстөмдүк кылат. Ал маегинде "мага кан жана зомбулук жагат. Ушунун баары ММАде бар. Албетте, чеги менен. Мен ушуну менен акча табам, ырахат да алам" деп айтканы бар. Мушташтан тапканы жакшы батир, автоунаа сатып алууга жете турганын кошумчалады. Убагында эки баласын жалгыз тарбиялаган энеси мындай максаттарга жете албай калганын белгилеп өттү.

Далай мушкерди жер караткан "муунтуу" ыкмасы тууралуу

Дүйнөдөгү бардык спортчулардын рейтингин аныктаган Sherdog порталынын маалыматы боюнча профессионалдар арасында 18 беттеш өткөрүп, анын 14дө утуп, үчөөсүндө жеңилип, бир жолу тең чыккан.

Проценко беттештеринин көбүн муунтуу ыкмасы менен жеңгенин көрүүгө болот. Көбү ушул ыкма "Юрийдики" деп айтышат. Бирок өзү аны катардагы ыкма катары эле көрөт. "Машыгуу учурунда грэпплинг менен көбүрөөк иштейм. Муунтканды 5-6 беттеш өткөргөндөн кийин так үйрөндүм. Бул мага көбүрөөк майнабын берет. Бирок муунткан менин өзгөчөлүгүм деп айтпайм" деди Проценко. Юрий мындан ары токтолбостон башка ыкмаларды да үйрөнүүнү максат кылганын белгиледи. 

Мыктыбек Мамасалиев мушкер катары мыкты!

Былтыр, 9-декабрда, JFC турниринде Проценко кыргызстандык Мыктыбек Мамасалиев менен чемпиондук кур үчүн беттешип, аны экинчи раундда муунтуу ыкмасы менен утуп алган.

Проценконун айтымында, беттеш жогорку деңгээлде өткөн. Кармашта Мамасалиевдин соккуларына араң туруштук бергенин белгилеп, анын мушкер катары мыкты экендигин айтты. "Турнир өз мекениңде өтүп жатканда башкача сезимде болосуң. Утсаң, албетте, жакшы. Эгер жеңилип калсаң, оор тиет. Анткени баарынын ишенимин актоо оор" дейт спортчу. Ошондой эле Мамасалиевдин Кыргызстанда күйөрмандары көп экендигин кошумчалады.

Тилек Жээнбеков менен боло турчу беттеши тууралуу

Оор салмактагы кыргызстандык мушкер Тилек Жээнбеков украиналык Проценкону 6-мартта өтө турган WEF Global 11 турниринин алкагында беттешүүгө чакырган болчу.

Проценко беттеш кандай болорун алдын ала айта албайт. Бардыгы спортчулардын даярдыгынан көз каранды дейт. "Кармашта биз күтпөгөн көрүнүштөр болуп кетиши ыктымал. Беттеш учурундагы тактикам мурун кандай болсо ошол боюнча эле калат. Эң башкысы — таамай соккудан алыс болгонго аракет кылам".

Спорт сүйүүчүлөр Юрий Проценкону күрөштө эмес, бокстун ыкмасы менен жеңүү оңой деп айтып келишет. Ал гана эмес, дүйнөдөгү бардык спортчулардын рейтингин аныктаган Sherdog порталынын маалыматы боюнча Проценко 18 беттеште үч гана жолу утулса, ошонун экөөсүндө техникалык нокаут менен жеңилген.