Кайын журтту теңине албай, башына чыгып кеткен да мырзалар жок эмес. Буга байланыштуу Sputnik Кыргызстан маалымат агенттиги кандай күйөө балдар кайын журттун кыжырын келтирерин тизмектеди.
Кайын-журтунун көзүнчө аялын кагып-силкип, кемсинткендер. Жаманбы-жакшыбы ал сенин аялың. Анын үстүнө келинчегиңдин ата-энесинин төрүндө отурасың. Үйдөн деле корсулдап, басынтканың жетишет.
Үйүнө барса жактырбагандар. Айрым күйөө балдар үйүнө кайната-кайненеси келип калса бөлмөсүнөн чыкпай жата берет. Анан да жактырбай "булар качан кетет" дегендей түр көрсөтүп кабагын ачпай отурганын кантесиң! Кайын журт үйүңө жашап албайт, көп болсо кызынан кабар алганы же тапкан-тергенин силерге бергени келди да. Бир күн болсо да жакшылап коноктоп, сый көрсөтүп кой!
Кайын журтунун көзүнчө ичип-чегип, сөгүнгөндөр. Кээ бир күйөө балдарды көрүп оозуң ачылат. Кайын-журтунун (көбүнчө кайнене, кайнатасы) көзүнчө эле ичип, чегип, атургай стакан кагыштырып койгондо күйбөгөн жериң күл болот. Күйөө баланын кайын журт менен сый болгону жакшы.
Аялына кол көтөргөндөр. Мындайлар арабызда сейрек кездешсе керек. Бирок кызын талпактан бетер тепкилеген күйөө балага кайсы кайын журт чыдасын…
Ордун билбегендер. Албетте, күйөө баланын орду келиндикине салыштырмалуу өйдөрөк. Бирок төргө өтүп, каалаганын кылууга болбойт. Кайын журтка айда-жылда бир барасың, конок тоссо малын союшуп, эл тейлеп, анча-мынча кызмат кылып койсоң эч жериң кемип калбайт.
