Совет мезгилинде "Каракол" тоо лыжа базасында СССРдин олимпиадалык курама командасы машыкчу. Азыр бул жайга көптөгөн чет өлкөлүк туристтер айрыкча Россия менен Казакстандын жарандары келип эс алышат. Экстремалдуу спортту сүйгөндөр жаратылыштын ажайып кооздугуна суктануу менен катар кыялын орундатуу үчүн узун жолду басышат.
Тоого чыгуучу жол (канаттык жол) элди деңиз деңгээлинен 3040 метрлик бийиктикке чейин жеткирет. Үйрөнчүктөр 400 метр, жакшы тепкендер 3 чакырымдык трассадан түшүшөт.
Тоо-лыжа базасынын жетекчиси Валерий Буйковдун айтымында, быйыл аталган аймакка кар аз жаагандыктан сезон ийгиликтүү болгон жок. Мындан улам алар кырдаалды жөнгө салыш үчүн кар себишкен.
Буйков быйыл чет өлкөдөн келген туристтер аз болгону менен кыргызстандык эс алуучулар көп экенин кошумчалады.
