Алматыда өткөн билим олимпиадасында кыргызстандыктар 7 медалга ээ болду

БИШКЕК, 17-янв. — Sputnik. Казакстанда өткөн Жаутыков атындагы XIV эл аралык олимпиадасында кыргызстандык окуучулар 2 күмүш, 5 коло медалга ээ болушту. Бул тууралуу эл аралык "Сапат" билим берүү мекемесинин маалымат кызматы билдирди.

Олимпиада 10-16-январь күндөрү Алматы шаарында өтүп, 15 өлкөдөн келген 483 окуучу математика, информатика жана физика сабактары боюнча күч сынашкан.

Кыргызстандан жалпысынан 28 окуучу барган.

Информатика сабагынан "Ош-Сема" лицейинин 11-классынын окуучусу Акбар Мадаминов күмүш медалга ээ болду. Ушул эле лицейдин 10-классынын окуучусу Мирбек Бакиров жана Караколдогу Хусейин Карасаев атындагы лицейинин 10-классынын окуучусу Өмүрбек Жамалов коло медалга ээ болушкан.

Математика сабагынан Хусейин Карасаев атындагы лицейинин 11-классынын окуучусу Дослан Жекшеев күмүш медаль тагынган. Аталган лицейдин 11–классынын окуучусу Азамат Мырзабеков, Cambridge Silk Road International School эл аралык мектебинин 12-классынын окуучусу Артур Садиков жана Нурдөөлөт Өмүрбеков коло медалга ээ болушту.

Бул олимпиада 2005-жылдан бери 15 мамлекеттин арасында өтүп келет. Негизги максаты – физика, математика жана информатика илимдерин жайылтуу, дүйнө жүзүндөгү мектептер арасында профессионалдык кызматташтыкты бекемдөө болуп саналат.