СССРдин эл артисти Сүймөнкүл Чокморовдун бул сүрөтү 1982-жылы жай мезгилинде өлкө аймагындагы жайлоолордун биринде тартылып алынган.
Ат үстүндө солдон биринчи турган Чокморов тоодо жергиликтүү жылкычылар менен жүргөн учуру.
Ошол кездеги ирмемдерди белгилүү актердун жакын досу Кыргыз Республикасынын эл сүрөтчүсү Абдрай Осмонов мындайча эскерет.
"Сүймөнкүл тоого өзүнчө сүрөт тартканы чыкчу, андан сырткары, ал жайлоого киного тартылганы көп барчу. Анан ал жакта киночулар кээде жаанды күтүп бош болуп калышат. Ошол учурда ал жөн отурбай сүрөт тартчу. Ал экөөбүз сүрөт боюнча училищеде, анан Ленинград шаарында чогуу окуганбыз. Кийин кино тармагында жүргөндө сен сүрөтчүсүңбү же актерсуңбу деп сурасак, биринчи "сүрөтчүмүн, анан гана актермун" деп айтып калчу", — деп эскерет Осмонов.
Чокморов кино жаатында мыкты эмгектенип, ошол эле маалда колунан калемин түшүрбөй сүрөт тартып жүрүп Эл сүрөтчүсү наамына чейин жеткен.
