БИШКЕК, 28-дек. — Sputnik. Бүгүн түнү Ош шаарынын 61 жаштагы тургунун өз үйүндө өлтүрүп, турак жайын өрттөп жиберген кылмышка шектелип анын коңшусу кармалды. Бул туурасында Ош ШИИБинин маалымат кызматынан билдиришти.
Кечээ, 27-декабрда, түштөн кийин кылмышка шектүү катары маркумдун 25 жаштагы коңшусу кармалды. Ал көрсөтмөсүндө өз үйүндө сыра ичип отуруп андан соң коңшусун тоноо максатында үйүнө барганын айткан.
"Түн ичинде короонун тосмосунан ашып өтүп үйүнө кирип бардым. Эшиги ачык экен. Киргенде үй ээси мени менен кармаша кетти. Колума ошол жерден отвертка тийди эле, аны менен көкүрөк тушка уруп жибердим. Аялы чуу салгандыктан аны үнү чыкпай калганча урдум. Анан өзүм коркуп кетип качып чыктым", — деп айткан шектүү көрсөтмөсүндө.
Ал эми турак жай өрттөлүшүн үй ээси менен мушташып жатканда бөлмөдөгү от жакан мештин кулап кеткени менен түшүндүргөн.
Бул факты боюнча Ош шаардык ички иштер башкармалыгынын тергѳѳ кызматы 97-берене (адам ѳлтүрүү) менен кылмыш ишин козгогон.
