БИШКЕК, 28-дек. — Sputnik. Жол кыймылы коопсуздугун камсыздоо боюнча башкы башкармалыгы (ЖКККББ) Бишкекте жүрүп бараткан Mercedes үлгүсүндөгү унаанын багажына чыгып алган кишини кармоого жарандардан жардам сурап жатат.
ЖКККББдан Sputnik Кыргызстан агенттигине билдиришкендей, адистер күбөнүн видеосун карап чыгышкан, бирок унаанын мамлекеттик номери так көрүнбөй койгон.
"Унаанын багажына чыгып алган кишини көргөн-билгендер, номерди жаттап калгандар болсо бизге кабарлап коюңуздар. Ал жаран мыйзам чегинде жоопко тартылышы керек", — деп айтылат маалыматта.
Унаалар жүрүп жаткан маалда багажга чыгып алган кишиге Административдик кодекстин "Автобейбашчылык" беренеси боюнча 5 миң сомго чейин айып салынат.
Зуулдап бараткан Mercedes Benz үлгүсүндөгү унаанын багажына чыгып алган эргулдун видеосу интернетке тарап кеткен. Андагы маалыматка караганда, окуя Чүй проспектиси менен Курманжан датка көчөсүнүн кесилишинде болгон.
