БИШКЕК, 27-дек. — Sputnik. Кыргызгидромет январь айында өлкө аймагында күтүлүп жаткан аба ырайынын божомолун билдирди.
Чүй жана Талас облустарынын дыйканчылык аймактарында аба ырайы климаттык нормадан бир градус төмөн болуп 3…5 градус суук болот. Кемин өрөөнү менен тоолуу аймактарда орточо эсеп менен 5…7 градус суук болот. Түндө 3…8 градус сууктан 10…15 градус суукка чейин абанын температурасы өзгөрүп турат. Ал эми айдын үчүнчү декадасында түндө суук 13…18 градуска жетсе, күндүз 3…8 градус суук болот.
Ысык-Көл облусунда январда абанын орточо температурасы 2…5 градус сууктан 6…8 градуска чейин болот. Түндө ызгаар 4…9 градустан 10…15 градуска чейин жетиши ыктымал. Ысык-Көл ойдуңунда 13…18 градуска чейин суук болот.
Нарын облусунда аба ырайы климаттык нормада сакталып, 14…16 градус суук болот. Түндө орточо температура —18…-23 градус болсо, күндүз 5…10 градус суук болот.
