БИШКЕК, 27-дек. — Sputnik. Өзбекстандын президенти Шавкат Мирзиёевдин сынынан кийин беш күн ичинде Финансы министрлиги, казыналык жана Пенсия фондусунда иштеген 560тан ашуун кызматкер жумуштан алынды. Бул тууралуу Sputnik Өзбекстан жазып чыкты.
Мирзиёев бешинчи күнү парламенттин эки палатасына кайрылып жатып Финансы министрлигинин жетекчилигине катуу сын айткан. Анда 10 күн ичинде иштин эскирген ыкмаларынан арылып, тез арада кадрларды алмаштырууну тапшырган.
"22-декабрдан бүгүнкү күнгө чейин финансы системасындагы мамлекеттик мекемеде иштеген 562 кызматкер жумуштан бошотулду. Алардын арасында Финансы министрлиги, казыналык жана Пенсия фондусунун адистери бар", — деп айтылат маалыматта.
Өзбекстандын Финансы министрлигине ноябрда Жамшид Кучкаров келген. Ал аталган кызматта 2005-жылдан бери иштеп келген Рустам Азимовду алмаштырган. Кучкаров вице-премьерликти да аркалап келет.
