БИШКЕК, 23-дек. — Sputnik. Борбор калаанын ички иштер башкармалыгынын жетекчиси Сталбек Рахманов шаар мэрине "102" линиясы боюнча иштей турган Ыкчам батальонду көрсөттү.
Рахмановдун айтымында, ички иштер органдарын реформалоонун алгагында түзүлгөн кызмат ишин расмий түрдө баштады.
"Калктын саны өсүшү менен "102ге" чакыруулар дагы көбөйдү. Ыкчам батальондун кызматкерлери дал ушул жакка түшкөн чакыруулар боюнча иштешет. Ошондой эле жергиликтүү бийлик, мэрия менен тыгыз байланышта болот", — деди Бекишев.
Ыкчам батальон Кайгуул милициясынан кескин айырмаланып, жол кыймылындагы коопсуздукка жооп бербейт.
"Мурда Кайгуул милициясы жолдогу тартипти кароо менен бирге "102ге" түшкөн чакырууларга дагы барчу", — деп түшүндүрдү Бекишев.
Иш-чаранын аягында жаңы кызматтын өздүк курамына коомдук тартипти, жарандардын коопсуздугун сактоо боюнча тапшырма берилди.
