БИШКЕК, 22-дек. — Sputnik. Бишкек ШИИБдин жол кыймылы коопсуздугун камсыздоо башкы башкармалыгынын кызматкерлери жолдун каршы тарабына чыгып, мушташ уюштуруп жибере жаздаган айдоочуну издеп жатат. Бул тууралуу ИИМдин жол кыймылы коопсуздугун камсыздоо башкы башкармалыгынын маалымат кызматы билдирди.
Интернетке жарыяланган видеодон Mercedes-Benz үлгүсүндөгү автоунаа жолдун каршы тилкесине чыкканын даана көрүүгө болот.
Видеону жарыялаган кишинин билдиришинче, ал машинанын жарыгын өчүрүп-жандырып ага эскертүү берген. Бул учурда жолдун каршы тилкесине чыккан айдоочу авторду көздөй чуркап келген.
"Машинанын терезесин жаап, ал жерден кетип калганга жетиштик. Тигил айдоочу автоунааны муштуму менен бир урганга үлгүрдү. Бул эмне деген кадам? Мындай айдоочулар шаарда толтура, башкаларды да сыйлабай, өзүн да сыйлбайт", — деди автор.
Видеодон күңүрт түстөгү Mercedes-Benz автоунаасынын мамлекеттик номери 345 AAF экени так көрүнөт.
