Воронцовкадагы оорукананы жакшыртууга 30 миллион сом керектелет. Бул тууралуу депутат Кубанычбек Нурматов парламентте сүйлөп жатып билдирди.
Анын айтымында, каражаттын жарымы ремонт иштерине, калган он беш миллион сому керектүү жабдууларды сатып алууга жумшалат.
"Воронцовкадагы ооруканага Кыргызстандын бардык бурчунан жарандар келишет. Алардын көпчүлүгү майыптар, баатыр энелер, Афган согушунун катышуучулары. Ал эми оорукананын абалы өтө начар. Ошондуктан 2018-жылы оңдоп-түзөө иштерине 15 миллион сом жана керектүү жабдууларды сатып алууга да ушунча сумма керек. Республикалык деңгээлдеги бул жалгыз оорукананын абалына үстүбүздөгү жылы жакшылап көңүл буруп койсоңуздар", — деди Нурматов.
Ал тогуз айдын жыйынтыгында республика боюнча аталган ооруканага беш миң адам келип, ден соолугун чындап кеткенин кошумчалады.
