БИШКЕК, 11-дек. — Sputnik. Кайгуул милициясынын унааларынын жаңы көрүнүшүнүн сүрөтүн Sputnik Кыргызстан агенттигине окурман жиберди. Кадр унаа жол жээгинде турган кезде тартылып алынган.
Сүрөттө көрүнүп тургандай, унаага жаңы өң кошулган. Тагыраагы, мурда техникада көк сызык бар болсо, эми ага кызыл өңдөгү дагы бир чийин кошулду.
Унаада "Жол кыймылынын коопсуздугун камсыз кылуу бөлүмү" деп жазылып турат.
Ал эми укук коргоо органдарындагы өздүк булак Sputnik Кыргызстан агенттигинин кабарчысына билдиргендей, сүрөттөгү унаа Кайгуул милициясынын жаңы унаасынын үлгүсү. Учурда бардык унааларга кызыл сызык чийилип, кызматкерлерге форма даярдалып жатканы кошумчаланды.
Маалыматка караганда, аталган башкармалык жаңылангандан кийин жолдогу коопсуздукту гана көзөмөлдөйт.
Органды кайра түзүү процесси анын аталышын өзгөртүүдөн башталды.
