БИШКЕК, 6-дек. — Sputnik. Борбор калаада селсаяктар үчүн дагы бир түнөк жай ачылды. Бул тууралуу Бишкек мэриясынын маалымат кызматы билдирди.
Жыл сайын 15-ноябрдан тарта Свердлов районунда селсаяктар үчүн Фере №34 а дареги боюнча убактылуу түнөк жай иштейт.
"Учурда имараттын ичи оңдолуп, терезелерге айнектер салынган. Андан сырткары, электр зымдары тартылып, имараттын чатыры оңдолгон. Жерге линолеум салынып, 40 кишиге ылайыктуу керебет жана тапчандар орнотулган. Азыркы маалда 20 киши түнөп жатат", — деп айтылат маалыматта.
Мэрия ошондой эле 50 кишиге деп жууркан-төшөк, шейшеп сатып алган.
Түнөк жайдан бир маал 35 сомго эсептелген ысык тамак берилет.
Бул жердеги тартипти сактоо үчүн инспектор бекилитип, мэрия тарабынан жума сайын медициналык кароо уюштурулуп турат.
