ОШ, 29-ноя. — Sputnik. 2017-жылдын 1-октябрына карата Ош облусу ВИЧ инфекциясын жуктургандардын саны боюнча өлкөдө биринчи орунда турат. Бул тууралуу облустук СПИДге каршы күрөшүү жана алдын алуу борборунун эпидемиология бөлүмүнүн башчысы Асан Дурусбеков Sputnik Кыргызстан агенттигине билдирди.
Анын айтымында, учурда бул илдетти жуктургандардын 36,7 пайызы Ош облусунда жашайт.
"Тактап айтканда, Кара-Суу районунда 781 адам, Ноокатта 278, Алайда 46, Араванда 45, Өзгөндө 143, Кара-Кулжада 42 жана Чон-Алайда 5 киши бул илдетке чалдыгып каттоодо турат. Республикалык СПИД борборунун расмий маалыматы боюнча кыргызстандыктардын арасында 6554 киши ВИЧ-инфекциясын жуктурган", — деди Дурусбеков.
"Ош шаарында 1039 адам каттоого алынса, облус боюнча 1344тү түзөт", — деди ал.
Ал эми ВИЧ инфекциясы азыраак катталган аймактарга Баткен, Ысык-Көл, Нарын, Талас облустары кирет.
