Улуу Британияда колу туткактар жаңы үлгүдөгү Mercedes-Benz автоунаасын бир мүнөткө жеткирбей уурдап кетишкенин Business Insider басылмасы жазып чыкты.
Маалыматка ылайык, окуя 25-сентябрда болгон. Уурулардын бардык аракеттерди видеобайкоого жазылып калган. Аны кийин Уэст-Миддленддин полициясы өзүнүн YouTube каналына жарыялаган.
Анда уурулар токтоп турган автоунаанын жанына келип, колундагы жабдуулар менен машинанын эшигин бир заматта ачып, билгизбей айдап кеткенин көрүүгө болот. Полиция уурдалган автоунааны таба элек.
Укук коргоо органдары мындай уурулардын изине түшүп, иштин бетин тез арада ачуу үчүн автоунаа ээлерине машина кайда экенин көрсөтүп турган атайын системаны орнотууну сунуштайт. Мындай система орнотулган автоунаалар бат табылат.
