БИШКЕК, 16-ноя. — Sputnik. Кыргызстандын тышкы иштер министри Эрлан Абдылдаев казак кесиптеши Кайрат Абдрахманов Алмазбек Атамбаев тууралуу айтып жатып, өзүнө-өзү каршы келген пикирлерди айтканын билдирди. Бул тууралуу Кыргызстандын Тышкы иштер министрлигинин маалымат кызматы кабарлады.
16-ноябрда Казакстандын тышкы иштер министри Кайрат Абдрахманов Кыргызстандын президентинин айткандары саясий маданияттуулукка жатпайт деп билдирген саясатчынын пикири менен макул экенин айткан.
"Кесиптешим, Казакстандын тышкы иштер министри Кайрат Абдрахманов өз билдирүүсүндө өзүнө каршы келген ойлорду айтты. Эгер ал билдирүүсүндө "дипломат жана Казакстандын тышкы иштер министри катары башка мамлекет башчысынын айткандарына баа берүүгө укугум жок" деп койгондо маселеге чекит коюлмак. Белгилүү саясатчы болсо дагы анын пикирин кубаттоо менен ал саясий маданияттуулукка жатпаган кадам жасады. Андыктан ал өзүнө-өзү каршы чыгууда", — деп Абдылдаев белгилеген.
