БИШКЕК, 15-ноя. — Sputnik. Борбор калаадагы "Манас" кинотеатрында "Ата" социалдык драмасы тар чөйрөгө көрсөтүлдү.
Иш-чарага тасманы жаратуучулар жана белгилүү инсандар келип, жаңы кинону жакшы кабыл алышты.
Тасманын режиссеру Бакыт Осмонкановдун айтымында, фильм 16-ноябрдан тарта Бишкектин бардык кинотеатрларында көрсөтүлө баштайт.
"Ата" социалдык драмасы — драма болгону менен өтө деле аянычтуу сюжет эмес. Бирок ойлонуп, жашоого мотивация ала турган жерлери бар. Муну менен катар тасма аркылуу адамдарга жакшы маанай тартуулоону чечтик. Кино 12 жаштагы уулун жана беш жаштагы кызын жалгыз чоңойткон ата жөнүндө болмокчу. Тасма аркылуу эненин ыйык экенин көрсөтүп, ата болуу чоң жоопкерчилик экенин айткыбыз келди", — деди режиссер.
Социалдык драмада Болот Тентимишов, Азамат Уланов, Асхат Сулайманов, Азиз Мурадиллаев сыяктуу мыкты актерлор роль жараткан.
