Шоу-бизнес жылдыздарын учурган "Тамашоу" лигасы тууралуу 5 факты

Долбоор 9 жылдык ишмердүүлүгүндө 100гө жакын команданы уясынан учуруп, бүгүнкү күндө 10-сезонуна жеткен убак.

Мындан улам Sputnik Кыргызстан маалымат агенттиги "Тамашоу" лигасы тууралуу 5 факты сунуштайт.

1. Идея кайдан келген? "Тамашоу" жаштар лигасын ачуу идеясы 2005-жылы жаралган. Буга чейин орус тилинде өтүп келген КВНден кийин "Тамашоунун" негиздөөчүсү Эрмек Нурбаевдин кыргыз тилинде ойносок деген тилеги күч эле. Ошол кезде Нурбаев "Браво" теледолбоорунун алып баруучусу, КВН чемпиону болчу. Нурбаев жана "Тамашоунун" азыркы редактору Арслан Ибрагимовдун ою бир жерден чыгып, лиганы ачууга белсенип киришет. Маркетинг, анализ, документтерди тууралоо жагынан Тилек Нурбаев жардам берген. Тилди өнүктүрүү максаты коюлгандыктан командага Нурзат Токтосунова чакырылган.

2. Эмнеге "Тамашоу"? Нурбаевдин айтымында, долбоорду ишке киргизүүдө эн чоң колдоочусу, анын таякеси — Кыргызстандын биринчи коргоо министри, генерал-майор Жаныбек Үмөталиев болчу. Нурбаев лиганын атын коюу үчүн таякесине күн сайын 10-15 ашык ой сунуштаганын айтат. Акыры тамаша менен шоуну ширетип, "Тамашоу" деген аталышты алып чыгышкан. Тилекке каршы, таякеси биринчи сезондун жабылышына күбө болуп, эртеси, 30-май күнү, дүйнө салган.

3. Логотибин ким ойлоп тапкан? 2008-жылы жайында "Новый формат" дизайнерлик студиясынын жетекчиси Медер Койлубаев менен биргеликте жөнөкөй быйтыкчага кыргыздын калпагын баса кийгизишкен. Нурбаевдин бул идеясын таякеси Үмөталиев "орус колобогу кыргыз калпагын кийиши — КВНдин кыргызча сүйлөй башташы" деп баалаган.

4. "Тамашоу" долбоорунда бир нече лига бар. Кыргызстандын аймактарында дагы долбоордун филиалдары иштейт. Жогорку лига — "Тамашоунун" эң башкы лигасы болуп эсептелет. Жогорку лиганын чемпиондору "Тамашоу" долбоорунун чемпиону болуп эсептелинет. Алып баруучусу Эрмек Нурбаев, ал эми командалардын оюнун калыстар, тагыраагы, өлкөнүн белгилүү адамдары: ырчы, музыкант, спортчу, жазуучу, актёр, шоумен, ишкер, режиссёр жана башкалар баалашат.

5. Учурдагы эмгек жамааты. Жалпысынан жети штаттык кызматкер эмгектенет. Оюндарга чукул 15-20 адамдын башы биригет. Президенти, негиздөөчүсү жана алып баруучусу — Эрмек Нурбаев, редактору — Арслан Ибрагимов. Административдик иштерди Замира Жээренчиева аткарат, долбоордун алдыңкы беш сезонунда Нурлан Жаныбеков эмгектенген. Долбоордун фото, видео, монтаж иштерин Азык Абдрахманов алып барат. Администраторлор — Таттыбүбү Садырбекова жана Шамшидин кызы Нургүл.