БИШКЕК, 4-ноя. — Sputnik. Бишкекте үч маршрутка кагышканын күбө Sputnik Кыргызстан агенттигине билдирди.
Ага ылайык, жол кырсыгы 4-ноябрда саат 18:00дөр чамасында Тойгонбаев жана Фрунзе көчөлөрүнүн кесилишинде катталган.
Күбөнүн айтымында, маршруткалардын бири Тойгонбаев көчөсү менен катуу ылдамдыкта келе жатып, Фрунзе көчөсүнө чыгып кеткен. Ал жерден газ баллон жүктөп бараткан маршрутка жана үчүнчү автоунаа менен кагышкан. Кагышуу катуу болгондуктан маршруткалар жолдон чыгып кеткен.
"Sprinter үлгүсүндөгү маршрутканын айдоочусу жол эрежесин бузду, ал эки автоунааны cүзүп, андан кийин турак-жайды сүзүп токтогон. Айдоочунун көз тушу жарылып, ооруканага алып кетишти", — деди күбө.
Кайгуул милиция башкармалыгы жол кырсыгы болгонун тастыктап, андан үч киши жаракат алганын билдирди.
Аталган факты боюнча бардык экспертизалар дайындалды.
