БИШКЕК, 2-ноя. — Sputnik. Кыргызстандык жүк ташуучулар Казакстандын мыйзамдарын көп бузуп жатканын Sputnik Казакстан агенттиги өлкөнүн Инвестиция жана өнүктүрүү министрлигине таянуу менен жазды.
Маалыматта 1-ноябрдан 2-ноябрга чейин текшерүүнүн жыйынтыгы менен Кыргызстандан барган 149 унаа 16 ирет мыйзам бузганы айтылат.
"Негизинен тез арада бузулчу жүктөрдү ташуу үчүн сертификаттын жоктугу, салмак параметрлеринин бузулушу аныкталган", — деп айтылат билдирүүдө.
Айып пулдун көлөмү 152 миң 300 теңгени (болжол менен 30,5 миң сом) түзгөн.
Мекеме мыйзамдын бузулушу тууралуу маалымат Кыргызстандын укук коргоо органдарына берилгенин кошумчалады.
Белгилей кетсек, эки мамлекеттин чек арасындагы тоскоолдуктар 10-октябрдан тарта жаралган. Расмий Астана бул карантиндик продукциялардын импорттолушуна бөгөт коюу үчүн жасалып жатат деп түшүндүргөн. 18-октябрь күнү премьер-министр Сапар Исаков Казакстанга барып жүргүнчүлөр автобустарын, жеңил автокөлүк менен жүк ташуучу унааларды кое берүү боюнча макулдашкан. Андан кийин деле абал олуттуу түрдө өзгөргөн эмес. Кийин бул маселе Ереванда өткөн ЕАЭБ мамлекеттеринин өкмөт башчыларынын жыйынында каралып, анда казак премьери Бакытжан Сагинтаев Кыргызстандын өкмөтүн бажы башкаруусу алсыз болуп жатат деп айыптап, окуя башкача өңүт алган. Буга кыргыз өкмөтү жооп берген. Эки өкмөттүн ортосунда тирешүү уланып, аталган мамлекеттердин ортосундагы чек арада жүк ташуучу миңдеген автоунаалар Казакстанга киргизилбей турат.
