БИШКЕК, 2-ноя. — Sputnik. Кыргыз Эл артисти, комузчу Нурак Абдрахмановдун 70 жылдыгына арналган концерт өткөрүлөт. Бул тууралуу уюштуруучулар кабарлашты.
Маалыматка ылайык, улуу комузчуну эскерүү, даӊазалоо багытындагы салтанаттуу концерт 10-ноябрь күнү Токтогул Сатылганов атындагы кыргыз улуттук филармониясында болмокчу.
19 Тогуздун айы 2017, 13:52
"Ага чейин 3-ноябрь күнү саат 10:00дө Ишенаалы Арабаев атындагы университетте "Нурак Абдрахманов залкар комузчу жана тарых изилдөөчү" аталышындагы илимий-чыгармачылык конференция болот. Ошондой эле 9-ноябрь күнү филармониянын кичи залында саат 10.00дөн баштап залкардын күүлөрүн аткаруучулар арасында сынак уюштурулмакчы", — деп жазылат маалыматта.
Нурак Абдрахманов 1947-жылы 19-октябрда Нарын облусунун Ак-Талаа районундагы Тоголок Молдо айылында жарыкка келген. Токтогул атындагы мамлекеттик сыйлыгынын лауреаты үч жыл мурун узакка созулган оорудан улам дүйнө салган.
