Малайзияда храмда өзүн бакшы деп эсептеген улгайган адам каадасын жасайм деп казанда күйүп каза болду. Бул тууралуу РИА Новости Mirror агенттигине таянып кабарлады.
Кара ит деген каймана аты бар Лим Ба "жан тазалоо үчүн" астында от күйүп жаткан темир казанга түшкөн. Ал түшкөндөн 30 мүнөт өтүп калганда иш-чаранын катышуучулары 68 жаштагы шамандын кыйкырып, чыгууга аракет кылып жатканын байкап калышкан. Храмдын кызматкерлери аны дароо алып чыгып, бирок өмүрүн сактап кала алышкан эмес. Катуу күйүп калган бакшы дарыгерлер келгичекти ошол жерден эле жан берген.
Белгилүү болгондой Лим Ба 10 жылдан бери өзүнүн жөрөлгөлөрүн жасап, казанда 75 мүнөткө чейин отура берчү. Акыркы учурда ал гипертония дарты менен жабыркап жүргөндүктөн, дарыгерлер анын мындай иштерге баруусуна тыюу салышкан.
